Snow White – Pantomima 2012
Wegħda hija dejjem wegħda. Xi tgħidu? U s-sena l-oħra wegħdnikom li jkollna Pantomima oħra, pantomima aqwa u aħjar! U nista’ ngħid b’wiċċi minn quddiem li Snow White kienet suċċess kbir. Fil-fatt mhux bi ftaħir u lanqas b’esaġerazzjoni, imma jkolli ngħid li l-ġurnali u magazines kemm lokali u kemm internazzjonali kienu mimlija b’ritratti tagħna. Intervisti ma’ l-atturi kollha ma waqfux!! u ġejna offruti bosta xogħlijiet f’teatri madwar id-dinja kollha. Insomma fi ftit kliem sirna famużi ma’ l-erba’ rjieħ tad-dinja.
Ma kinitx biċċa xogħol ħafifa tafux! L-ewwel problema li kellna naffaċċaw kien il-fatt li l-imbierka Manann kienet qegħda taħdem bħala nanny fil-palazz bla ktieb tax-xogħol u tgħidx x’inkwiet daħħlitna fih!! Għal ftit ma spiċċajnix kollha ġoċ-ċipp minħabba fiha għax meta ġew tal-Labour Office ħebbet għalihom. Imnalla kien Mr Bum Bum li bħala President ta’ l-Ghaqda Kaċċaturi u Nassaba tal-Blata l-Bajda qabeż għalina.
Imbagħad kellna problema oħra. Dik l-imbierka qattusa ta’ Snow White intilfet fil-foresta u ħadna battikata papali biex sibniha. Insomma imnalla kien Stuffy, il-qattus tal-Prinċep tal-Blata s-Sewda li sabha mwerwra ġo tank ta’ l-ilma.
U Fredu ħolqilna problema oħra! Għax kulħadd kien konvint li fl-istorja ta’ Snow White in-nani kienu sebgħa mhux tmienja. Allura meta sar magħruf li fid-dar ċkejkna fil-foresta kien hemm Fredu ukoll, missier in-nani ried jagħmillu test tad-DNA! Insomma fl-aħħar kollox għadda b’wiċċ il-ġid!
U issa? Xi jmiss? Stennew u taraw!!
Narawkom Milied ieħor …. tgħid nissogra nżid, b’xi ħaġa aqwa u aħjar????
Daniela Dimech
