Is-Sbejħa u l-Mostru – Pantomima 2013

Is-Sbejħa u l-Mostru   –  Pantomima 2013

DSCF0875

Għaddiet sena oħra u wasal Milied ieħor!  Inħossni xjaħt mis-sena l-oħra lil hawn,  imma l-aħwa il-memorja tiegħi għadha tajba u niftakar sew li s-sena l -oħra issugrajt inwegħdkom pantomima isbaħ u aħjar!  Tiftakru?  U ħa ngħidilkom dis-sena kellna biex nitqazzu!  Kellna kustumi mill-isbaħ u make up professjonali.  Il-popolarita tagħna bħala atturi  kompliet tizdied u sirna l-għira ta’ kulħadd!  Bi ftaħir nistgħu ngħidu li qed nissudaw!!

Nimmaġina li kulħadd jaf bl-istorja tas-Sbejħa u l-Mostru.  Imma li ma tafux hu li ħadd qatt ma ssogra jgħidilkom l-istorja vera!!  Ara aħna għamilna riċerka profonda u studju dettaljat u kellna l-kuraġġ nwasslu lil kulħadd l-istorja kif vera ġrat!  Ħadd qatt ma ssogra jitkellem fuq l-imħabba bejn  is-Sur Harry Ħarbat u Gerfex, missier is-Sbejħa Juliet u l-ġara tiegħu, Daisy Dandelion Debono Galizia.

Avolja tafux,  għal Daisy ma kinitx ħaġa faċli li tirbaħ l-imħabba ta’ dan ix-xjenzat naqra spissjat li aktar kien moħħu f’ Farfettus Rarissimus Levissimus Purissimus milli fiha.  U ejja ngħidu s-sew … Imnalla kienu l- fairies Jilly u Lilly  u l-vleġġa maġika tagħhom għax kieku Daisy kienet tibqa’ bix-xewqa.

U l-Mostru?  Xi ngħidu għalih?  Kienet ħaġa faċli għalih li jirbaħ l-imħabba tas-Sbejħa Juliet?  Bi ftit għajnuna  ta’ Mrs Potts, Cupsie,  Enemalte, Ticky  u Ms Rix , ħaddiema fil-palazz u tas-saħħara t-tajba, Rosie kollox mexa ħarir avolja kellna nikkumbattu kontra Gustav li tilef għaqlu wara Juliet!

U kif jaf min rana, kienet ġlieda qalila mmens!! Uzajna xwabel, zkuk, xkupi, borom … insomma kull ma ġie għal idejna!!   Imma fl-aħħar is-sewwa ħareġ rebbieħ!!  Anzi ejja npoġġuha aħjar .. l-imħabba ħarġet rebbieħa … Avolja skond Veffa, is-saħħara l-ħazina, l-imħabba ma tezistix!!  Imma tajniha risposta!!

U-s-sena d-dieħla ?  Tgħid nagħmlu oħra?  U mela le!!

Narawkom is-sena d-dieħla!   U ħa nitfanfar ftit ejja … b’pantomima aqwa u aħjar!!

 

Daniela Dimech